Pirates e hlola papadi ya pele sehleng sena
Sehlopha sa Orlando Pirates se hlotse sehlopha sa Stellenbosch ka ntlha e lengwe ho noto (1 – 0) papading e bapalletseng lebalengla Orlando. Tlholo ena ke ya pele ya Pirates ho Betway premiership.
Pirates e qadile sehla ka monyebe le ho lahlehelwa ke dipapadi tse pedi tse qalang tlasa mokwetlisi Abdeslam Ouaddou.
Setlabotjha Kamogelo Sebelebele ya tswileng tjaro ya mabonwa, o hlabetse Pirates ntlha tlholo le ho ikgapela kgau ya sebapadi sa letsatsi.
Ntlha ya Sebelebele, ke ya hae ya bobedi ka hara mebala ya Orlando Pirates. Ntlha ya pele o hlabile kgahlano le Mamelodi Sundowns papading ya MTN8.
Tlholo ya Pirates e kokobetsa kgalefo e teng balateding ba sa kgotsofalang tsela eo sehlopha sa bona se qadileng sehla ka yona.
Pirates, e qetile sehla se fitileng e dutse boemong ba bobedi le ho tswa dipapading tse tlang pele ho makgaolakgang (semi-finals) dipapading tsa CAF Champions League.
Ka moqebelo, Pirates e tla etela Sundowns leotong la bobedi la papadi tse tlang pele ho makgaolakgang (semi-final) ho MTN8. Leotong la pele, Pirates le Sundowns di bapetse maleka a (1 – 1).
Papading ena eo ditekete tsa yona di rekisitsweng kaofela, e tla bapalla lebaleng Lucas Masterpieces Moripe. Papadi e tla thakgoha ka hora ya 15:00 thapama.
