Brayan Leon o hlaba dintlha ho fokotsa sekgeo kgahlano le Pirates
Setlabotjha sa mohlabadintlha sehlopheng sa Mamelodi Sundowns Brayan Leon Muniz, o tswelapele ho bapala karolo ya bohlokwa sehlopheng jwalo ka ha a ntse a tlwaela makgulo.
Leon, o hlabile dintlha tse pedi ha Sundowns e ne e hlola Pirates ka 2 – 0 papading e bapalletseng lebaleng la FNB bosiu ba laboraro.
Letswalla lena la Colombia, le tswile tjaro ya mabonwa e bonwang ke dintja mme o hlaba dintlha lenyelenyele ho ya le ho kgutla.
Leon o se a hlabile dintlha tse nne dipapading tse pedi tsa moraorao ho thusa Sundowns ho hapa dipapadi tsa bohlokwa mehopeng e fapaneng (CAF Champions League le Betway Premiership).
Ka kakaretso sebapadi sena se se hlabile dintlha tse 6 dipapading tse 7 tseo a seng a dibapetse ka hara mebala ya Sundowns.
Dintlha tsa Leon kgahlano le Pirates, dithusitse sehlopha ho fokotsa sekgeo sa dintlha (points) kgahlano le yona Pirates e ka hodimo tafoleng ya dihlopha ka dintlha tse 38 ka mora dipapadi tse 17.
Sundowns, e dutse dintlheng tse 35 ka mora dipapadi tse 16 mme sekgeo ke dintlha tse tharo.
Leon o robile rekoto ya Pirates ya ho bapala dipapadi tse ngata (14) e sa lahlehelwe moo e bapetseng tse 11 lapeng le ho dihlola kaofela.
BALA HAPE:
