Chiefs e kenya manala boemong ba boraro le ho fokotsa sekgeo sa Pirates
Sehlopha se boemong ba boraro sa Kaizer Chiefs, se kentse manala le ho tseparelang maemong a sona ka tsela e tsotwang.
Chiefs, e hlotse TS Galaxy e ntseng e ritsa ho ya tlase ka 2 – 0 papading e bapalletseng lebaleng la FNB ka sontaha thapama.
Dintlha tsa Chiefs, dikene dikarolong tse pedi tsa papadi ka Flavio Silva le Makabi Lelipo ka ho fapana.
Papadi ena, e ile ya lokela ho emiswa ka mora hore lehodimo le fetohe le mabone a lebala a nke nako ho kgantsha.
Ka mora hore mabone a kgantshe, papadi e kgutle, maemo a lehodimo a ile a hlwenya le ho feta mme papadi ya ekeletswa nako ya ho kgefutsa.
Le ha hole jwalo, dibapadi dikgutletse ka lebaleng moo Chiefs e hlabileng ntlha ya bobedi pele papadi e fihla pheletsong.
Chiefs e hlotse papadi ya bone ka tatellano ka mora ho hlolwa dipapading tse nne tse tlileng pele ho ditlholo tsena.
Tlholo ena ke ya botshelela sehleng sena sehlopha se bapalla lapeng mme ke lekgetlo la pele sehlopha se hapa dipapadi tse fetang hlano ka mora ho etsa seo ka 2019/2020 moo sehlopha se hapileng dipapadi tse 8 lapeng.
Sehlopha setla tswa se dutse boemong ba boraro ka dintlha tse 42 ka mora dipapadi tse 22. Chiefs e morao ka dipapadi tse pedi papisong le sehlopha se bobeding le boemong ba bone.
Papading e latelang, Chiefs e thulana le Magesi FC e dutseng mohateng ka laboraro la 15 Mmesa.
BALA HAPE: Tshepo e sale kgolo ho mokwetlisi wa Orlando Pirates
