Keagan Buchanan o beha mejafashe papading ya bolo
Sebapadi sa mehleng sa Kaizer Chiefs le Bloemfontein Celtic Keagan Wilbur Buchanan, o behile mejafashe papading ya bolo ka mora dilemo tse fetang leshome e le sebapadi boemong bo phahameng (professional).
Letswallwa la Cape Town, ke sebapadi se hlaselang (attacking midfielder) mme o bapalletse dihlopha tse hlano boemong bo phahameng ho PSL.
Ka selemo sa 2013/2014, Buchanan o ne a bapalla sehlopha sa Bloemfontein Celtic mme a leba ho Amakhosi ka selemo sa 2016/2017 moo a dutseng dihla tse pedi pele a leba ho Maritzburg United.
Sebapadi sena se dilemo di 33, se fihlile dihlopheng tse jwalo ka Amazulu le Cape Town Spurs, eo e leng sehlopha sa hae sa ho qetela.
Ka mora ho arohana le Spurs ka 2024/2025, Buchanan o hlokile sehlopha pele ho qeto ya hae ya ho beha mejafashe.
Buchanan o bapetse dipapadi tse 177 ho kenyeletsa le tsa mehope mme a hlaba dintlha tse 4 le ho thusetsa ntlheng tse 14 (assists).
O boetse a bapalla sehlopha sa naha sa baka tlase ho 20 (Amajita) moo a bapetseng dipapadi tse tharo.Buchanan o lebohile bohle ba bileng le seabo papading ya hae ya bolo ho tloha le sale lesea.
“Ho tloha kele dilemo di 8 ho Ajax ka toro ya ho bapala bolo, ke tletse ho leboha. Bolo e mphile tsohle, metsotso ya ho hopolwa, metswalle le dithuto tsa bophelo kaofela,” ho realo Buchanan.
Sebapadi sena se lebohile bohle ho tloha bakwetlising, dibapadi tsa mehleng le batshehetsi ba dihlopha tse fapapeng.
BALA HAPE: Bafana Bafana ba leba mohopeng wa lefatshe
