Modiehi Makole o hapa kgau ya sebapadi sa selemo

Sebapadi sa papadi ya Volleyball Modiehi Makole, o tlotlwa ka hoba sebapadi sa selemo sa mosadi ke Central University of Technology (CUT) kapa CUT Sports.

CUT, e ne e tshwere dikgau tsa selemo le selemo ho tlotla dibapadi tsa bona tse ipabotseng ka makgabane dipapading tse fapaneng.

Makole, ke se seng sa dibapadi tse bileng le selemo se monate papading ya Volleyball moo e bileng karolo ya sehlopha ditlhodisanong tse jwalo ka tsa USSA le tse ding.

Sebapadi sena se hlahang motseng wa Excelsior, Free State, ke sebapadi se qadileng papadi ya Volleyball sehlopheng sa se lehae sa MadBuddies Volleyball Club (MBVC) tlasa leihlo le matla la Zoniselo ‘Master’ Mntwana.

Makole ke se seng sa dibapadi tsa sehlopha sena se ntseng se tswelapele ho ngola mabitso a bona papading ena le ho emela sehlopha ka bokgabane le boqhetseke.

Hara tse ding tsa dibapadi, re ka qolla, Tankiso Mantsoe, Clement Goodman le Sello Nkali bao ebileng karolo ya National Championship.

Makole, o hlalositse ha ane a thabile le ho makala ka mora ho amohela kgau ya sebapadi sa mosadi sa selemo ho CUT Sports.

“Ho bua nnete, kene ke na le maikutlo a kopakaneng ho ba moo ke sa tlwaelang (out of comfort zone), hoba ngwanana ya tswang motseng o monyane, ke utlwile ke le lehlohonolo,” ho realo Makole.

Sebapadi sena se hlalositse ha sebile le selemo se nang le diphepetso, empa sa lwana le ho etsa bonnete ba hore eba karolo ya sehlopha sa CUT Volleyball.

“Ho bile le diphepetso mona le mane, ho tlwaela tsela ya ho etsa dintho sehlopheng, ho tlwaela makgulo jwalo ka moithuti ya fihlang (first year student).

“E bile qeto e nepahetseng eo ke nkileng ya ho ba karolo ya sehlopha mme ke fanne ka tsohle tsa ka sehlopheng le hoba sebapadi sa mantlha.”