Marumo Gallants e nyaola le ho phatlalatsa mokwetlisi

Sehlopha se dutseng bobeng tafoleng ya dihlopha ho Betway Premiership sa Marumo Gallants, se phatlaladitse hase tekenne mokwetlisi ya tla kena dieteng tsa Alexandre Lafitte.

Sehlopha hasa tsibisa semmuso ka ho nyaolwa ha Laffite empa phatlalatsong ya mokwetlisi ya montjha, ke moo ho tsibisitseng ha Laffite a arohane le sehlopha mme Jamil Benouahi a tla kokomala se maratswana.

Lekgetlo la ho qetela Gallants e bua ka Laffite ke ka nako eo ba neng ba tsibisa ka ho behelwa ha hae ka thoko mosebetseng mathwasong a kgwedi ya Hlakubele ka seo base hlalositseng e le diphuputso tsa boitshwaro tsa ka hare [internal disciplinary process].

BALA HAPE: Ditekete tsa dipapadi tsa Pirates difela jwalo ka matokonane

Benouahi, o fihla ho Gallants a tswa sehlopheng sa AS FAR ya Morocco moo a neng a sebetsa jwalo ka motlatsa mokwetlisi le sehlopheng sa Rahimo moo a sebeditseng jwalo ka mokwetlisi.

Nakong ya hae ho Rahimo, Benouahi o kwetlisitse dipapadi tse 4 moo a hapileng papadi e le nngwe, a bapala maleka ho e le nngwe le ho lahlehelwa dipapading tse pedi.

Letswallwa lena la Morocco o tshwere mangolo a UEFA PRO Licence a ho kwetlisa mme ke mokwetlisi ya ratang ho sebedisa lewa la 3 – 5 – 2 flat.

BALA HAPE: Chiefs e phatlalatsa sehlopha sa basadi, mokwetlisi le mabala