Mokwetlisi wa mehleng wa Pirates o leba Algeria
Mokwetlisi wa mehleng wa sehlopha sa Orlando Pirates Milutin “Micho” Sredojević, ke mokwetlisi ya motjha wa sehlopha sa ES Sétif ya Algeria.
Micho o leba Algeria ka mora hore sehlopha sena se leke ho fumana ditshebeletso tsa mokwetlisi e mong wa Pirates Jose Riveiro.
Riveiro, o hane mosebetsi wa ho kwetlisa Sétif ka mora hore a nke dikgwedi tse tharo fela e le mokwetlisi wa Al Ahly ka mora ho arohana le Pirares.
Micho, o tla kopana le Rhulani Mokoena ya kwetlisang MC Alger e dihulang pele tafoleng ya dihlopha.
Mokoena le Micho, ba sebeditse kaofela jwalo ka mokwetlisi le motlatsi ka nako eo Micho a neng a le ho Pirates pele a leba Afrika leboya.
Micho, o tekena tumellano e tla matha ho fihla ka 2027 Phupjane, e leng sehla le sekgeshana ho tloha ha jwale.
Letswallwa lena la Serbia ke mohahlaula jwalo ka ha a se a kwetlisitse le dihlopha tsa naha tse jwalo ka Uganda eo a e fihlisitseng dipapading tsa AFCON ka mora dilemo e sa bapale boemong ba matjhabatjhaba.
Micho o se a fitileng dihlopheng tse jwalo ka Club Giants: SC Villa (Uganda), Zamalek (Egypt), St. George (Ethiopia), Young Africans (Tanzania) le Al Hilal (Sudan).
