Ribeiro o kata Sundowns ka samane le ho leba ho FIFA

Sebapadi sa Mamelodi Sundowns se hlaselang Lucas Ribeiro Costa, o lebisa sehlopha sa hae lekgotleng la dinyewe la FIFA (FIFA Football Tribunal).

Sena ka mora hore sehlopha sa Sundowns se hlolwe ke ho fihlella ditumelano le dihlopha tse feteng tse pedi tse neng di batla ditshebeletso tsa letswallwa lena la Brazilian.

Ribeiro Costa ya bitsang Sundowns sehlopha sa mehleng, o tsibisitse ha a file sehlopha tokomane ya ho kopa ho lokollwa sehlopheng (termination letter) le ho leba ho FIFA ho hlalosa lehlakore la hae le ho fumana tharollo.

“Ke dumela ha kena le matla a ho kopa ho lokollwa ke sehlopha [Mamelodi Sundowns] e leng seo ke tla se hlalosa ho FIFA Football Tribunal,” ho realo Ribeiro.

Sundowns e fumana dikopo ho tswa dihlopheng tse jwalo ka Qatar SC le Fluminense ya Brazil moo dineng di batla ditshebeletso tsa Ribeiro empa ha ho sehlopha se mofumaneng.

Ribeiro o ne a se a dumellane le sehlopha se jwalo ka Qatar SC le ho tshepiswa moropotsohadi wa tjhelete mme hone ho le matsohong a Sundowns ho fana ka tumello.

Ditlaleho di kuma ha Ribeiro a emetswe ke maqhwetha a Dupont Hissel law firm a tshwarang dinyewe tse kgolo papading ya bolo mme hana jwale ba shebane le nyewe ya Diarra moo ho qoswang FIFA.

BALA HAPE: qatar-sc-e-tlohela-dipuisano-le-sundowns-ka-ribeiro