Afrika Boroa e hlola Zimbabwe ho fetela mokgahlelong o lateng

Sehlopha sa naha sa Bafana Bafana, se hlotse naha ya Zimbabwe ka 3 – 2 papading ya ho qetela ya dihlotshwana ho fetela mokgahlelong o latelang wa AFCON.

Afrika Boroa, e ne e hloka ntlha kapa tse tharo ho fetela pele ha Zimbabwe e ne e hloka tlholo ka kotloloho ho fetela dihlopheng tse 16 tsa ho qetela lekgetlo la pele nalaneng ya sehlopha.

Papading e qadile ka sefutho dihlopha ka bobedi le ha Zimbabwe e ne e phahametse Afrika Boroa ka ho ba kenya tlasa kgatello.

Motsotsong wa 7, Tshepang Moremi o fumanetse Afrika Boroa ntlha ka bolo e thutsing Divine Lungu pele e fihla ka lethanteng.

Metsotso ka mora moo, Zimbabwe e fumane ntlha e lekanyang ka Tawanda Maswanhise ya neng a le lenyokonyane haholo.

Papadi e lebile kgefutsong ka maleka a 1 – 1 mme hang ka mora kgefutso, Afrika Boroa ke ha e kgutla e fetotse mawa le ho kenya Bathusi Aubaas bakeng sa Sphephelo Sithole.

Lyle Foster, o hlabetse Afrika Boroa ntlha ya bobedi e bile e le ya hae ya bobedi tlhodisanong ka mora phoso ya lebota la Zimbabwe la morao.

Metsotso ka mora moo, ke ha Maswanhise a kenya Afrika Boroa tlasa kgatello le ho qobella Aubrey Modiba ho itlhaba ka lerumo ka mora hore Ronwen Williams a tshireletse bolo e matla le ho lekanya dintlha (2 – 2).

Bafana Bafana ba fumana thaho ya mokoko ka mora hore Marvelous Nakamba a etse phoso mme ya hlabuwa ke Oswin Appollis eo e bileng yena sebapadi sa letsatsi.

Ka mora tlholo ena, sehlopha setla emela ho tseba hore setla thulana le naha e feng dipakeng tsa Ivory Coast le Cameroon.

BALA HAPE: Mokwetlisi wa Senegal o lemosa dihlopha ka Bafana Bafana