Gallants e rothofatsa ditoro tsa Sundowns

Sehlopha sa Marumo Gallants, se rothofaditse ditoro tsa Mamelodi Sundowns ka hoba hlola thahong ya mekoko papading ya Carling Knockout lebaleng Lucas Moripe.

Gallants e hlotse sehlopha sena se fihlileng makgaolakgang sehleng se fitileng mokgahlelong wa pele (first round) ka mekoko e 7 – 6 ka mora hore dihlopha bobedi dihlolwe ke ho hlaba ntlha metsotsong ya semmuso (0 – 0).

Sundowns e ne e hateletse papadi jwalo ka tlwaelo, empa baeti Gallants, ba tlile ba ikemiseditse le ho itukisetsa Sundowns e matla le hoba masene.

Setlabotjha Miguel Reisinho wa Sundowns, ya keneng a tswa bankeng e bile e le papadiya hae ya pele, o ile a bontshwa karete e kgubedu ka mora mmapalo o bohlahlwa metsotso e tsheletseng a le ka lebaleng.

Papadi e fedile ka 0 – 0 mme ya leba nakong e ekeditsweng moo dihlopha ditswetseng pele ho homana ntle le ho hlabana, ho fihlela papadi e leba thahong ya mekoko.

Thahong ya mekoko dithibathibane bobedi dibapetse ka bokgabane le ha Washington Arubi a tswile pele ka ho thiba mekoko e meraro le ho hlaba wa ho qetela ho fa Gallants tlholo.

Sebapadi sa Mamelodi Sundowns Tashreeq Matthews, e bile yena sebapadi sa letsatsi le ha sehlopha sa hae e saba sona bahlodi.

Mokwetlisi wa Gallants e bile e le mokwetlisi ya monyane ka ho fitisisa ho Betway Premiership Alexandre Lafitte, o se a bapetse le Sundowns makgetlo a mabedi sehleng sena mme ha a so lahlehelwe ke papadi jwalo ka ha a hapa ya hae ya pele kgahlano le bompudi ba Betway.

BALA HAPE: Orlando Pirates e phetha Siwelele