Keletso Makgalwa o hlalosa qeto ya ho leba Tanzania
Sebapadi sa mehleng sa Mamelodi Sundowns le Sekhukhune United Keletso Makgalwa, o hlalositse qeto ya hae ya ho leba naheng ya Tanzania.
Makgalwa o lebile Tanzania sehlopheng sa Simba SC ka mora karohano ya hae e makaditseng ke Sekhukhune.
Sebapadi sena, se hlalositse ha qeto ena e bile ho batla qalo e ntjha naheng e nngwe ke ha a ne a batlwa ke dihlopha tse mmalwa tsa Betway Premiership.
“Ho bile le dihlopha tse tharo tse bontshitseng kgahleho AmaZulu le Kaizer Chiefs mme e bile kopo tse kgahlang,” ho realo Makgalwa puisanong le IDiski Times.
“Le ha hole jwalo, ke utlwile ke hloka qalo e ntjha naheng e fapaneng ho bona hore e tsamaya jwang.”
Makgalwa o hlalositse ha a dumela e le qeto e nepahetseng ho leba Tanzania sehlopheng se bapalang ditlhodisano tsa kontinente.
“Ke nahana ke nkile qeto e nepahetseng ka Simba moo ke kgonang le ho thusa lapeng lehlakoreng la ditjhelete.”
Simba e phepetsana le Young Africans e kwetliswang ke Manqoba Mngqithi ya kileng a sebetsa le Makgalwa mme ka bobedi ditseka boemo ba pele.
BALA: Cardoso o etsa thapedi ka baletsaphala pele ho makgaolakgang a MTN8
