Mokwena o hapa dipapadi tse hlano ka tatellano
Mokwetlisi wa MC Alger Rhulani Mokwena, o hapile papadi ya hae ya bohlano ka tatellano ho Algerian Ligue 1 ka mora ho hlola sehlopha sa USM Khechela bosiung ba maobane.
Letswallwa lena la Afrika Boroa le kwetlisang naheng ya Algeria, sele bapetse dipapadi tse tsheletseng tafoleng ya dihlopha tsa Algeria (Ligue 1) mme a bapala maleka papading e le nngwe le ho hlola tse hlano.
Mokwena o kwetlisa sehlopha se tshireletsang sekola ka mora ho hapa sehla se fitileng mme ke karolo ya CAF Champions League.
Le ha a fetetse dipapading tsa mekgahlelo ho CAF, Mokoena o bapetse dipapadi tse nne ho CAF mme a hapa papadi e le nngwe le ho bapala maleka dipapading tse tharo.
Ka kakaretso mokwetlisi enwa wa mehleng wa Mamelodi Sundowns le Wydad Casablanca, o se a bapetse dipapadi tse leshome ha e sale a fihla Algeria mme o hapile tse tsheletseng le ho bapala maleka ho tse nne.
Ha jwale sehlopha sa MC Alger se dutse ka hodimo ka dintlha tse 16 ka mora dipapadi tse tsheletseng mme ha se so hlolwe.
Mokwena ke e mong wa ma’Afrika Boroa a ntse a tswelapele ho itshupa dinaheng tsa Afrika Leboya jwalo ka mokwetlisi.
E mong wa bakwetlisi ba hona hodimo moo, ke Fadlu Davids ya kwetlisang naheng ya Morocco sehlopheng sa Raja Club Athletic mme letsatsi pele ho papadi ya Mokwena, ke ha Raja ya Davids e nkane le Wydad ya Thembinkosi Lorch.
Dihlopha tsena ka bobedi dibapetse maleka a 0 – 0 mme ke tsona fela dihlopha tse so hlolwe le Botolo e leng tafole ya dihlopha ka Morocco.
