Mokwetlisi wa Chiefs o re mosebetsi o sale mongata

Ka mora ho hlola papadi ya boraro ka tatellano dipapading tsa kontinente, mokwetlisi wa Kaizer Chiefs Khalil Ben Youssef, o hlalositse ha mosebetsi o sale mongata wa sehlopha.

Chiefs e hlotse Al Masry ka 2 – 1 papading e bileng matla ka sontaha thapama lebaleng la New Peter Mokaba, Polokwane.

Chiefs e kene papading ena e le tlasa kgatello le ha e ne ena le monyetla wa ho feta pele ka papadi ka letsohong.

Khalil, o hlalositse ha mosebetsi o le mongata o lokelang ho etswa papading ya ho qeta e tla hlalosa e bang Chiefs e fetela pele kapa jwang.

“Hare so etse letho, rena le papadi e nngwe bakeng sa ho fetela pele. Ha jwale re eteletse sehlotshwana pele empa hona le papadi e lokela ho bapala mme re lokela ho fumana bonyane ntlha e le nngwe hare kgutla Egypt,” ho realo Khalil.

Dintlha tsa Chiefs dihlajowe ke Flavio Silva e le thaho ya mokoko karolong ya pele ya papadi le Aden McCarthy karolong ya bobedi ya papadi.

Chiefs e ne ena le monyetla wa ho fetela pele ka papadi ka letsohong mme bane ba hloka ho hlola Al Masry ka palo ya dintlha tse ngata kapa 2 – 0 hoba le letsoho le ka hodimo ho Al Masry (upper head to head).

Ha jwale sehlopha se dutse ka hodimo sehlotshwaneng sa D ka dintlha tse 10 mme ba feta Zamalek e bobedi ka dintlha tse 2.

Chiefs e tla etela Egypt mafelong a beke a tlang moo e tla thulana le Zamalek e nyekang maqeba ka mora ho hlolwa ke ZESCO United ka 1 – 0.

BALA HAPE: Dihlopha tsa Afrika Boroa dihloka tlholo dipapading tsa CAF