Pirates e tswelapele ho hana ka Mofokeng

Sehlopha sa Orlando Pirates se tswelapele ho hana ka sebapadi sa bona sa mantlha jwalo ka dihlopha ditswelapele ho iketa bakeng sa Relebohile Mofokeng.

Ho latela ditlaleho tsa moraorao ka lesedinyana la iDiski Times, Pirates e satswa hana ho rekisetsa sehlopha sa Russian Mofokeng ka mora hore sehlopha sena sa FC Akron Tolyatti se behe tjhelete e kalo ka $1.5-million (R26m) tafoleng ya dipuisano.

Sehlopha sena se kena lenaneng la dihlopha tsa matjhabatjha tse batlang ditshebeletso tsa Mofokeng le ha fela sekepele sa bona sele ka tlase ho sa sehlopha sa Minnesota ya America $2 million (R35 million).

Dihlopha tse jwalo ka Al-Ettifaq ya Mohau Nkota, Maccabi Haifa le Maccabi Tel Aviv se dikile tsa leka ho fumana sebapadi sena sa selemo ho Betway Premiership makgetlo a mabedi ka tatellano ntle le katleho.

Tebello ke ho bona ebang Mokfokeng o tla hle a dule sehlopheng jwalo ka ha thekisetsano ya dibapadi kwano lapeng e se e setse ka matsatsi a se makae pele e kwala (22 Lwetse).

Mofokeng o haufi haholo le ho etsa dipapadi tse lekgolo sehlopheng se seholo jwalo ka ha a se a bapetse dipapadi tse 96 le ho hlaba dintlha tse 18 le ho thusetsa ho tse 22.

Mafelong a na a beke Pirates e tla bapala makgaolakgang a MTN8 kgahlano le Stellenbosch FC. Papadi ena e tla bapalla lebaleng la Mbombela ka hora ya botshelela 18:00 thapama.

BALA HAPE: Minnesota ya America e batla ditshehetso tsa Mofokeng