Afrika Boroa e hapa letoto Australia

Sehlopha sa naha sa di’Proteas se hlola papadi ya bobedi ho tse tharo tsa letoto la dipapadi tsa letsatsi ka leng (ODI) ho la Australia.

Afrika Boroa, e hlotse Australia ka mematho e 84 le ho hapa letoto le ha ho setse papadi e lengwe (2 – 0). Dibapadi Matthew Breetzke le Lungisani Ngidi, ba ipabotse ka makgabane papading eo.

Di’Proteas tse bapetseng ntle le mokaptene Temba Bavuma ya phomoditsweng ho latela mosebetsi wa hae sehlopheng, di hapile lotho mme tsa kgetha ho otla pele.

Dibapadi tse bulang Ryan Rickelton (8) le mokaptene wa letsatsi Aiden Makram (0), ha ba qala hantle ka ha ba ketotswe papadi e qeta ho qala.

Tony de Zorzi (38), Matthew Breetzke (88) le Tristan Stubbs (75) ba e hlanakile senna ka ho kgutlisa tshepo le ho aha morao bakeng sa Afrika Boroa pele ba ketolwa.

Dibapadi tsa Afrika Boroa di tswile kaofela naha e dutse ho mematho e 277 ka overa ya ho qetela (49.1 overs).

Makenong a bona a ho akgela, Afrika Boroa e etseditse Australia mpipetsi ditloha ha Nandre Burger le Wiaan Mulder ba ketola dibapadi tse bulang.

Lungisani Ngidi, o kene lekokong ha a ne a ketola dibapadi tse hlano (fifer) le ho thusa Di’Proteas ho ntsha Australia ka mora mematho e 193.

Afrika Boroa, e se e tla bapalla tswekere le ho lelekisa ho kgutla basa hlolwa ha ba bapala papadi ya boraro e leng ya ho qetela ya letoto.

Papadi ya ho qetela e tla bapala ka sontaha sa la 24 Phato ka 06:30 ka nako ya kwano Afrika Boroa.

BALA HAPE: proteas-di-hapa-papadi-ya-pele