Afrika Boroa e hlaselwa ke dikotsi
Sebapadi sa Afrika Boroa se otlang Tony de Zorzi, a ke ke a tswelapele ho bapala papadi tse pedi tse setseng tsa ODI ka mora ho huleya mosifa papading ya pele kgahlano le England.
de Zorzi o huleile mosifa ka nako eo Afrika Boroa e ne e le yona e akgelang kgahlano le England moo Afrika Boroa e hapile papadi ka wicket tse 7.
de Zorzi o tla dula kantle le Kagiso Rabada ya lemetseng ha Afrika Boroa e ne bapala letoto la T20 le Australia.
Sebapadi se ntseng se ipabola ka makgabane mofuteng ona wa papadi e leng Matthew Breetzke, o lebelletswe ho qala le papadi jwalo ka ha a ile a phomotswa papadi ya pele.
Breetzke ke sebapadi sa pele lefatsheng ho etsa mematho e 150 ka papadi ya hae ya pele ya ODI, ke sebapadi sa pele ho etsa 378 ka papadi tse nne tse qala le ho etsa mematho e 50 makgetho a mane ka tatellano dipapading tsa hae tsa pele (debut).
Tebello ke hore Codi Yusuf e tlaba karolo ya sehlopha ho thusetsa dibapading tse akgelang ka sekgatla (fast bowlers) jwalo ka ha Rabada a ke ke a bapala.
Afrika Boroa, e tla nkana le England papadi ya bobedi ya ODI. Papadi ena e tla thakgoha ka hora ya 14:00 ka nako ya Afrika Boroa lebaleng la Lord’s, England.
E bang Afrika e hapa papadi, e tlabe e hapile letoto le ha ho tlabe ho setse papadi. Ha jwale Afrika Boroa e itlhomme pele dipapading tse tharo.
BALA HAPE: diproteas-di-hapa-papadi-ya-pele-ya-odi
