Krikete: India e amohelwa ka thupa Afrika Boroa

Sehlopha sa naha sa basadi papading ya krikete se amohetse baeti ba bona ka thupa ya wicket tse 6 papading ya pele ho tse hlano tsa T20 motsemoholo Durban.

Di’Proteas, dihlotse India ka wicket tse 6 papading ya pula madiboho a letotong le etsang nalane la India ho etela Afrika Boroa.

Di’Proteas dihapile lotho mme tsa kgetha ho akgela pele ha India e qala ka ho otla makenong a pele. Baeti India, ba kgonne ho bokeletsa mematho e 157 ho tswile dibapadi tse 7 [157/7].

Ayabonga Khaka [3], Tumi Sekhukhune [2] le Nonkululeko Mlaba [1], ke bona ba ketoletseng Afrika Boroa di’wicket le ho nyopisa merero ya India ya ho nka taolo ya papadi ka molangwana.

Makenong a bobedi ka molangwana, Afrika Boroa e nkile taolo papading ka mokapteni Laura Wolvaardt [51]. Annerie Dercksen [44*] ya keng e le sebapad sa bone, o lwanne ya kgumamela a thusana le Chloe Tryon [18] ho qeta papadi ho setse dibolo tse 5 mme sehlopha se entse mematho e 158 ho tswile dibapadi tse 4 [158/4].

Ayabonga Khaka ya ketotseng dibapadi tse tharo [3 wickets] e bile yena sebapadi sa letsatsi ka mora papadi e ntle ka bolo ka letsohong.

Sehlopha setla kena papading ya bobedi ka mora o hodimo wa tlholo ya papadi ya pele.

Papadi ya bobedi e tla bapala ka sontaha [19 Mmesa] hona leblane la Kingsmead, Durban mme e tla thakgoha ka 14:00 motsheare.

BALA HAPE: Van der Dussen o beha molangwana fatshe lekgetlo la ho qetela