Afrika Boroa e hlola papadi ya bobedi ho atamela tlholo ya letoto
Sehlopha se ntseng sele kgabong sa basadi papading ya krikete, se hapile papadi ya bona ya bobedi kgahlano le naha e etetseng Afrika Boroa ya India.
Di’Proteas, dihapile papadi ya bobedi ya T20 ka wicket tse 8 e bile e le tlholo ya bobedi letotong la dipapadi tse hlano.
Afrika Boroa, e hapile lotho le ho qobella India ho qala ka ho otla ha bona ba qala ka ho akgela jwalo ka papading ya pele.
Tumi Sekhukhune [3] le Chloe Tryon [3] ba ketotse dibapadi tse tsheletseng ba arolelana ha Nonkululeko Mlaba [1] le Nadine De Klerk [1] ba ketotse sebapadi kang.
Sehlopha se qobelletse India ho tswa kaofela ka mematho e 147 mme makenong a bona, Afrika Boroa e lelekisitse palo eo ka over tse 17.1 le ho etsa mematho e 148 ho tswile dibapadi tse pedi [148/2].
Laura Wolvaardt jwalo ka tlwaelo, o eteletse sehlopha pele ka bokgabane pele a ketolwa a dutse memathong e 54 e bile e le ‘Half century’ ya hae ya bobedi dipapading tse pedi tsa T20.
Sune Luus, le yena o bontshitse makgabane a hae ka ho etsa mematho e 57 pele a ketolwa mme Tazmin Brits [20*] le Annerie Dercksen [12*] e bileng bona ba qetileng papading bale kgabong ka molangwana.
Dipapading tse tharo tse setseng, Afrika Boroa e tla hloka ho hapa papadi e le nngwe ho ikgapela letoto jwalo ka ha ho setse kgwedi pele mohope wa lefatshe wa T20 o thakgoha.
Papadi e latelang ya boraro, e tla bapala kala 22 Mmesa mme e tla bapalla lebaleng la Wanderers, Johannesburg.
