Baroka e rengwa ke selepe se lebisang ho ABC Motsepe League
Sehlopha sa Baroka FC se rengwe ke selepe sa Motsepe Foundation Championship ka mora ho hlolwa ke Kruger United e batlang ho ipona ho Betway Premiership sehleng setlang.
Kruger, e hlotse Baroka ka 3 – 0 ba bile ba romela sehlopha sena ho bapala ho ABC Motsepe sehleng setlang sa dipapadi.
Baroka e kileng ya bapala boemong bo phahameng ka ho fitisisa Afrika Boroa (Betway Premiership), e theohetse ho Motsepe Foundation ka 2022 ka mora ho qeta dihla tse tsheletseng (6 seasons) e bapala ho ABSA eo kajeno e bitswang Betway.
Ka 2018 Baroka e bile bona bahlodi ba mohope wa Telkom Knockout e tsebahalang ka Carling Knockout moo ba hlotseng Orlando Pirates ho hapa mohope wa bona wa pele o moholo.
Sehleng sa 2019/2020 sehlopha sena e bile sona se thibelang Kaizer Chiefs ho hapa sehla ka ho bapala maleka le Chiefs ka nako eo Chiefs e neng e hloka dintlha tse tharo.
Sehleng se latelang seo ke moo sehlopha se qetileng sele boemong ba 10 e leng boemong bo hodimo ka ho fitisisa boo sehlopha se kileng sa qeta sele ho bona.
Mafelong a sehla sa 2021/2022 ke ha Baroka e rengwa ke selepe ho leba ho Motsepe Foundation moo ba bileng le mathata mme sehleng setlang batla bapala ho ABC Motsepe.
Baroka e tlaba le leng la mabitso a maholo ho bapala lebatoweng lena ka mora hore Jomo Cosmo, Santos le Cape Town Spurs direngwe le ho qobelleha ho bapala boemong ba boraro (third tier) ya Afrika Boroa.
Sehlopha se seng se dutseng bobeng ke sa Black Leopards seo le sona e leng sa Limpopo mme e bile se kile sa bapala ho Betway Premiership (ABSA/DSTV ya ka nako eo).
