Chiefs e hapa papadi ya boraro ho dula boemong ba boraro
Sehlopha se tshwarang se tlohela sa Kaizer Chiefs, se hapile papadi ya sona ya boraro ka tatellano hane se hlola Orbit College e mathateng ka mantaha motsheare.
Chiefs, e hlotse Orbit ka 3 – 1 papading e bapeletseng lebaleng la Nelson Mandela profenseng ya Eastern Cape le ha e ne e le papadi ya Orbit ya lapeng.
Orbit e nkile ketapele ya papadi motsotsong wa 22 ka Mbulelo Wagaba pele Chiefs e arabela ka Wandile Duba ho setse metsotso e meraro pele papadi e leba kgefutsong.
Karolong ya bobedi ya papadi Chiefs e tlile ka sefutho le ho kenya Orbit tlasa kgatello e makatsang. Phetoho ya Flavio Silva le Siphesihle Ndlovu, difile Chiefs taolo ya mpa ya lebala le monyetla wa ho hlasela ha bonolo.
Ntlha ya bobedi ya Chiefs, e kene ka Mduduzi Shabalala ka mora motsamao o motle ka Thabiso Monyane le Duba ho tlola bolo bakeng sa Shabalala ho hlaba ntlha.
Ntlha ya boraro, e kene ka Ndlovu e le bolo e tswang seretheng sa Silva ho qeta papadi [3 – 1] le ho beha sehlopha boemong ba boraro.
Tlholo ena keya Chiefs ya boraro ka tatellano ka mora ho hlolwa dipapading tse nne ka tatellano.
Sehlopha setla tswa se dutse boemong ba boraro ka dintlha tse 39 ka mora dipapadi tse 21.
Papadi e latelang ya Chiefs, e tlaba kgahlano le TS Galaxy e kgothetseng ka mora ho fetelang ho makgaolakgang a Nedbank Cup.
BALA HAPE: Nkota o kgutlela ka lebaleng ho thusa Al-Ettifaq ho hlola papadi
