Doctor Khumalo o babatsa bokgoni ba sebapadi sa Sundowns
Sebapadi sa mehleng sa Kaizer Chiefs le Bafana Bafana Doctor Khumalo, o babaditse bokgabane ba setlabotjha sehlopheng sa Mamelodi Sundowns.
Khumalo o hlalositse ha a so bone sebapadi sa bokgoni boo Nuno Santos a nang le bona kwano Afrika Boroa.
“Hakeso bone sebapadi se neletsanang bolo ka bokgabane le bohlale jwalo. Santos o bala papadi ka bokgabane le ho ba pele ka monahano ho feta dibapadi tse ding,” ho realo Khumalo.
Moqhaqhulli (analyst) enwa wa SABC Sport, o hlalositse ha Nuno a lokela ke ho bapala boemong bo phahameng mme le Sundowns e lokela ke ho tlotlwa ka leihlo la dipapadi tse ntle.
“Dibapadi tsa boemo ba hae dilokelwa ke ho bapala boemong bo phahameng papading ya bolo lefatsheng. Sehlopha sa Sundowns se lokelwa ke ho babatswa ka leihlo la bona ho fumaneng dibapadi tse hlwahlwa.”
Santos ya bapetseng dihlopheng tsa naha ya Portugal tsa ntsetsopeleng, o se a bapetse dipapadi tse pedi sehlopheng sa Sundowns le ha e nngwe a qadile bankeng.
Letswallwa lena la Portugal, o se a hapile kgau ya sebapadi sa letsatsi ha Sundowns e ne e hlola Richards Bay ka ntlha tse nne ho e le nngwe (4 – 1).
Sundowns e tekenne Santos ka mora hore Lucas Ribeiro Costa a ba nyahlatse le ho leba Spain mme tebello ke ho bona e bang Santos o tla kwala sekgeo sa Ribeiro le ha mokwetlisi Miguel Cardoso a hlalosetsa ha a sa tlela ho kwala sekgeo.
BALA HAPE: Golden Arrows e tlabola Mamelodi Sundowns
