Kaizer Chiefs e tekena mmapala-pele Khanyisa Mayo
Sehlopha sa Kaizer Chiefs se nnetefaditse ha se tekenne sebapadi sa mehleng sa CR Belouizdad ya Algeria e leng Khanyisa Mayo.
Mayo o lebile Algeria a tloha sehlopheng sa Cape Town City ka tjhelete e lekanyetswang ho R20 million ka kgwedi ya Phato 2024.
Sebapadi sena se bapalang lepheyong le ka pele jwalo ka mohlabadintlha, o bapetse dipapadi tse 27 sehlopha sa Belouizdad le ho hlaba dintlha tse nne mme a thusetsa ntlheng e lengwe.
Pejana kgweding ena, sehlopha sa Belouizdad se phatlaladitse mabitso a dibapadi tse meralong ya mokwetlisi Sead Ramovic mme Mayo e ne e se karolo ya lenane leo.
Chiefs e tlotse matjato a masesane ho tekena Mayo eo e leng kgale sehlopha se batla ditshebeletso tsa hae. Mayo o hlalositse ha a thabetse hoba karolo ya sehlopha a bile a potlaketse ho ipona mebaleng ya sehlopha.
“Ke thabetse ho le tsibisa hore ke kgutlela lapeng hoba karolo ya sehlopha se sehlo sa Kaizer Chiefs. Ke leKhosi, mme ke tatetse ho ipona kele karolo ya sehlopha (love and peace).”
Mayo ke sebapadi sa bo 11 seo Chiefs e se tekena sehleng sena jwalo ka ha ba ntse ba tswelapele ho matlafatsa sehlopha bakeng sa sehla se seng se qadile sa 2025/2026.
