TS Galaxy e busetsa molamu sefateng ka Milford FC ho Nedbank Cup

Sehlopha sa TS Galaxy se phumutsi dikeledi tsa ho hlolwa ke Orlando Pirates ka ho hlola Milford FC papading ya Nedbank Cup lebaleng la Solomon Mahlangu, Mpumalanga.

Galaxy, e hlotse Milford ka 4 – 3 thahong ya mekoko ka mora hore bobedi dihlopha ditshabane bophatswa ka 1 – 1 ka lebaleng.

‘The Rockets’ ba kene papading ena le dithatohatsi ka lebaka la ho bapala ho Betway Premiership le nalane ya bona mohopeng ona.

Ka ho le leng, Milford le bona, ba kene ka boitshepo ka mora ho hlola dihlopha tse matla ho kenyeletsa Sekhukhune se bapalang ho Betway ka thaho ya mekoko.

Sehlopha sena sa KZN, se nkile ketapele ya papadi metsotsong e 11 ka Siphosethu Ndlabi e le bolo e neng e tswa ho Bulelani Sigomoshe.

Papadi e lebile kgefutsong ka 1 – 0 le menyetla e leshongwana eo dihlopha ka bobedi dibapetseng ka yona.

Karolong ya bobedi ya papadi ke moo Galaxy e qadileng ho botsa dipotso le ho bontsha maikemisetso a ho fumana ntlha e lekanyang.

Ka mora motsamao o tsotehang ka Seluleko Mahlambi, Victor Letswalo o fumanetse Galaxy ntlha e lekanyang le ho kgutlisa tshepo ya ho hapa papadi.

Dihlopha dilebile thahong ya mekoko moo dithibathibane disebeditseng ho feta, le ha sethibathibane sa Galaxy e bile sona mohlae ka mora ho thiba mekokoko e mmedi.

Durban City e fitileng pele, e tla thulana le TS Galaxy ho makgaolakgang a tla bapala ka letsatsi le nako tse tla phatlalatwa le lebala.

BALA HAPE: Vilakazi o leboha hore Sundowns e tlohile ka pela bona