Mofokeng o hlalosa mantswe a Broos pele a kena ka lebaleng
Sebapadi sa Orlando Pirates se hlaselang sehlopheng sa naha Relebohile Mofokeng, o hlalositse mantswe a mokwetlisi pele a mo kenya ka lebaleng.
Mofokeng o kene ka lebaleng a tswa bankeng karolong ya bobedi ya papadi mme ho kena ha hae ho bile le karolo e kgolo mmapalong wa sehlopha.
Mofokeng o hlalositse ha Broos a mo jwetsitse hore e be yena a bapele le ho natefelwa.
“Ditaelo tsa mokwetlisi e bile hore ke bapale ka mora dibapadi tse tshireletsang (Defensive midfielders),” ho realo Mofokeng.
BALA: Mokoena o kgutlisa tshepo ya ho fetela pele ka ntlha
Sebapadi sena se fetotse sebopeho sa papadi moo Afrika Borwa e neng e se e kgona ho hlasela ka matla le ho kenya Czechia tlasa kgatello.
“Re bapetse hantle karolong ya bobedi ya papadi le ho kenya kgatello.”
Mofokeng o hlalositse ha mantswe a Broos a bile makgutlwane le ho totobala.
“E bile papadi yaka ya pele ya mohope wa lefatshe, mokwetlisi o itse ke be le boitshepo.”
“Ke boemo bo hodimo ba dipapadi bo hlokang hore o be le boitshepo le ho bapala ka tsohle.”
Papadi e latelang ya sehlopha e tlaba ka la 25 Phupjane mme e tla bapala ka 03:00 mesong ka nako ya Afrika Borwa.
