Seema o sebedisa makejakejane a DDC ho hlola Chiefs

Mokwetlisi wa Siwelele FC o leka metsi ka lere le ho sebedisa makejakejane ho hlola Chiefs mme teko ya hae e sebeditse ha sehlopha sene se hlola Kaizer Chiefs.

Siwelele, se makaditse Chiefs ka ho ba hlola ka 2 – 0 papading e bapalletseng lebaleng la Toyota bosiu ba laboraro.

Dintlha tsa Siwelele, dikene ka Teboho Potsane ya kileng a feta mebaleng ya Chiefs le Siphesihle Jeza ya tswang ntshetso peleng.

Ka bobedi dintlha tsena dikene karolong ya pele ya papadi moo ya pele e keneng motsotsong wa bosupa ha ya bobedi e kene motsotsong wa 26.

Mokwetlisi wa sehlopha Lehlohonolo Seema, o ne a tswakile sehlopha ka sebedisa makejakejane a DDC moo le leng la makejakejane ao [Jeza] a hlabetseng sehlopha ntlha ya bobedi e bile e le ntlha ya hae ya pele sehlopheng se seholo.

Chiefs, e kene papading ena ka mora dipapadi tse supileng e so lahlehelwa moo e hapileng tse hlano ka tatellano le ho bapala maleka ho tse pedi ka tatellano.

Siwelele ka lehlakoreng le leng, se kene papading ena ka mora dipapadi tse nne ntle le ho latswa tlholo.

Sehlopha sene se hloka dintlha tse tharo hoba monyetleng wa ho kena dihlopheng tse 8 tse ka hodimo bakeng sa tlhodisano ya MTN8 sehleng setlang.

Chiefs e tla tswa e dutse maemong a boraro ka dintlha tse 47 ka mora dipapadi tse 26 ha Siwelele se nyolohela boemong ba bo 9 ka dintlha tse 32 ka mora dipapadi tse 26.

Dihlopha tsa Betway Premiership kaofela dibapetse dipapadi tse 26 mme hosetse dipapadi tse 4 pele sehla se fihla pheletsong.

Papadi e latelang ya Siwelele, etlaba kgahlano le Durban City pele ho papadi e matla kgahlano le Mamelodi Sundowns.

BALA HAPE: Broos o ngongorehiswa ke dibapadi tsa naha tse sa bapaleng dihlopheng tsa tsona