Arrows e kgaqisitse Gallants moriana wa bona
Sehlopha sa Golden Arrows se hlotse sa Marumo Gallants ka ntlha tse nne ho noto papading e bapetseng ka sontaha thapama lebaleng la King Zwelithini.
Arrows, e latswisitse Gallants moriana wa bona wa ntlha tse nne ka mora hore Gallants e hlole Stellenbosch 4 – 0 hara beke mohopeng wa Carling Knockout.
Mohlabadintlha Junior Dion, o hlabile ntlha ya pele ya Arrows le ho itlhoma pele ka dintlha tse ngata ho Betway Premiership (7 goals).
Lekejakejane la Ivory Coast Issac Cisse, o hlabile ntlha ya bobedi e le ho atolosa ketapele ya Abafana Besthende.
Thokozani Khumalo ya keng a hlaha bankeng a bile a bapala papadi ya hae ya boraro ya sehla, o hlabile ntlha tse pedi ho buretsa Gallants 4 – 0.
Sehlopha sena sa Manqoba Mngqithi, se bonahala se tsohile molota ka mora ho qala sehla ka monyebe.
Dipapading tse tsheletseng tsa ho qetela, Arrows e lahlehetswe papading e le nngwe mme ya hlola dipapadi tse hlano.
Ha jwale Arrows e dutse boemong ba bosupa ka dipapadi tse 11. Ba hapile dipapadi tse hlano, ba hlolwa ho tse hlano le ho bapala maleka papading e le nngwe mme ba bokeleditse dintlha tse 16.
Papadi ya sehlopha e latelang e tlaba kgahlano le sehlopha sa Orlando Pirates ka laboraro [05 Pudungwane].
Arrows e tla boela e amohela Gallants papading ya Carling Knockout mafelong a tlang a beke lebaleng la King Zwelithini.
Bala ditaba tse ding tse amanang le Gallants le Arrows:
