City e tsoha molota le ho bontsha maikemisetso a ho kgutla
Bompudi ba mohope wa MTN ba selemo sa 2018 ba tsoha molota tafoleng ya dihlopha boemong bo Motsepe Championship Foundation.
Cape Town City e ileng ya rengwa ke selepe le ho theohela tlasa boemong ba PSL, e qadile ho iphumana ka mora ho qala sehla ka monyebe.
City, e ile ya lokela ho etsa diphetho tse jwalo ka ho arohana le tse ding tsa dibapadi tsa bona tsa mantlha e le ho ipapisa le e meng ya melawana ya moo ba bapalang.
Le ha hole jwalo, sehlopha se ile sa tekena tse ding tsa dibapadi tse jwalo ka Njabulo Ngcobo, Sifiso Mngobeni le ba bang ho matlafatsa sehlopha le ho leka ho kgutlela ho Betway.
Sehlopha sena se tsohile molato mme se bonahala sena le maikemisetso a ho kgutla ka mora ho hapa dipapadi tse hlano ka tatellano.
Papading ya bona ya ho qetela, City e hlotse Pretoria University (Tuks) ka 4 – 0 mme dintlha tseo kaofela dikene karolong ya bobedi ya papadi.
City, e dutse boemong ba bone ka dipapadi tse 16 moo e hlotsweng ho tse 4, ya bapala maleka dipapading tse 4 le ho hlola dipapadi tse 8 mme ka selataneng ba bokeletsa dintlha tse 28.
Sekgeo dipakeng tsa sehlopha seka hodimo sa Miford le City ke ntlha tse pedi. Sehlopha sa bobedi le sa boraro (Casric Stars le Kruger United) didutse dintlheng tse 29.
City e tla thulana le Casric e rothofaditseng ditoro tsa bona tsa ho dula ho Betway sehleng se fitileng. Papadi ena e tla bapala ka labohlano [31 Pherekgong] ka 15:30.
BALA HAPE: Ntlha ya Lilepo e beha Amakhosi botleng lebelong la ho hapa sehla
