Durban City e ema ditoro tsa Siwelele ka pele
Sehlopha se hapileng mohope wa Nedbank sa Durban City, se lwanne ya kgumamela ho thibela Siwelele ho fihlela e nngwe ya ditoro tsa bona.
Siwelele, sene se amohetse Durban City lebaleng la Dr Ratlai Molemela bosiung ba labobedi moo dihlopha bobedi dibapetseng maleka a 2 – 2.
City, e hlabile ntlha pele ka Jean Lwamba mme Siwelele sa arabela ka Bohlale Ngwato.
Karolong ya bobedi ya papadi Siwelele se atolositse ketepele ka Ghampani Lungu mme City ya arabela le ho lekanya dintlha ka Lwamba.
BALA HAPE: Chaine o ngola nalane e ntjha ya dithibathibane sehlopheng sa Pirates
Sehlopha sa lapeng [Siwelele] se kene papading ena ka maikemisetso a ho fumana dintlha tse tharo le ho fumana sebaka dihlopheng tse 8 tse ka hodimo tafoleng ya dihlopha.
Tshepo e sale tseng bakeng sa Siwelele ho qeta e le dihlopheng tse 8 tse ka hodimo le ha dipapadi tse tharo tse setseng, e le dipapadi tse boima.
Dipapadi tse setseng tsa Siwelele:
9 May 2026 – vs Mamelodi Sundowns
16 May 2026 – vs Magesi F.C.
23 May 2026 – vs Sekhukhune United
Sehlopha se dutse boemong ba 9 ka dintlha tse 33 ka mora dipapadi tse 27.
BALA HAPE: Makgopa le Maswanganyi ba thusa Pirates ho beha Sundowns mangole
