Luc Eymael o ikarabella mantsweng a Sinesipho Mali

Mokwetlisi wa mehleng wa Chippa United Luc Eymael o ikarabela mantsweng a setho sa tsamaiso (Sporting Director) Sinesipho Mali a hore Eymael o ne a sa thabela boleng ba dibapadi.

Mali, o tshwaetse pejana ka Eymael hore o ne a sa kgotsofalla boleng bz dibapadi tseo sehlopha senang le tsona pokellong ke ka hoo a ne a sa kgone ho fihlela tse ding tsa ditabatabelo tsa sehlopha.

United le Eymael ba arohane mathwasong a beke ka mora hore sehlopha se hlalose sesa thabela tshebetso ya Eymael.

Mokwetlisi enwa wa mehleng wa Free State Stars, o hlalositse ha Mali a le leshano le ho lokela ho jara maikarabelo a mantswe a hae.

“Ha ke ya bua mantswe ao, o lokela ho jara boikarabelo ka mantswe a hae. Ke itse re hloka ho hlwaya karolo tse itseng ka nako ya thekiso ya dibapadi,” ho realo Eymael.

“Ha ke ya bua hampe ka sehlopha, ke hlalositse fela hore re hloka dibapadi tse nang le boiphihlelo sehlopheng.”

United e bapetse dipapadi tse supileng tlasa Eymael, ya hapile papadi e le nngwe ya bapala maleka dipapading tse pedi le ho lahlehelwa dipapading tse nne.

Ha jwale United e kwetliswa ke Vusimuzi Kanu Vilakazi, e leng mokwetlisi wa bone sehleng sena sehlopheng sena sa Eastern Cape.

BALA HAPE: Chippa United e nyaola bakwetlisi