Mbekezeli Mbokazi o nka MLS ka setsokotsane

Sebapadi sa ntshetso pele ya Orlando Pirates seo ha jwale se bapalang naheng ya America Mbekezeli ‘TLB’ Mbokazi, se tswelapele ho ikahela lebitso sehlopheng sa Chicago Fire.

Mbokazi, o hapile kgau ya sebapadi sa letsatsi ha sehlopha sa hae sene se hapa papadi kgahlano le Atlanta ka 1 – 0 mafelong a beke.

TLB, o tshotse seo e kabeng e le ntlha kgahlano le sehlopha sa hae ka mora hore sethibathibane sa hae setswe mekwallong.

Mbokazi o ne a sa qale ho tshola bolo moleng e leba ka mekwallong ya sehlopha sa hae mme tsela eo sebapadi sena se bapalang ka yona e tswelapele ho moetsa thatohatsi ya batshehetsi.

Papadi e ntle ya Mbokazi, e thusitse sehlopha ho hapa papadi ya boraro ka tatellano mme tlholo eo e bile ya bobedi ya sehlopha moo se sa hlajweng ntlha.

Ka mora papadi ya mafelo a beke, Chicago Fire e tloletse boemong ba bobedi ka dipapadi tse 7 le dintlha tse 13 mme ba ka hodima sehlopha sa Inter Miami e bapallwang ke Lionel Messi le Luis Suarez.

BALA HAPE: Sekhukhune se nyaola Tinkler le ho tshwarisa Masehe marapo