Mokwetlisi Shukri o hlalotsa molaetsa ho Brevis

Mokwetlisi wa sehlopha sa naha papading ya Cricket, Conrad Shukri o ntshitse maikutlo ka mora papadi ya sehlopha sa hae sa T20.

Afrika Boroa e hlotse Australia papading ya bobedi ya T20 ka mematho e 53. Tlholo ena, e lekantse dintlha hoba 1 – 1.

Sebapadi Dewald Brevis o ipabotse ka makgabane papading eo ka ho etsa mematho e 125* a sa tswa.

Shukri, o hlalositse lekejakejane Dewald Brevis jwalo ka sebapadi se hlwahlwa seo banang le sona sehlopheng.

“Ke talente ya moloko, ha e sale ke utlwa seo. O robile rekoto ya lefatshe ya baka tlase ho 19 le ha e se motho ya robang direkoto,” ho real Shukri.

Dewald o robile direkoto tse mmalwa ha a ne a etsa 125* ya hae ya pele ho T20. Sebapadi sena e bile sa pele sa Afrika Boroa ho etsa lekgolo (100) ka dilemo tsa hae (22).

Ke sebapadi sa bobedi sa Afrika Boroa ho etsa lekgolo ka bolo tse nyane 41.

Brevis ke sebapadi sa pele ho etsa lekgolo kgahlano le Australia mabaleng a Australia ebile ke sebapadi sa pele ho etsa mematho e 125* sa Afrika Boroa.

Shukri o re molaetsa wa hae ho Brevis o bobebe. “Ke dula ke mo jwetsa, re thabise, o re thabise ha lelele,” Shukri a phethela.

Afrika Boroa e tla nkana le Australia papading ya ho qetela e le ya makgaolakgang ka moqebelo. Mohlodi wa papadi ena, e tlaba yena mohlodi wa letooto la papadi tsena tse tharo.

BALA HAPE: africa-boroa-e-lekanya-ditlha-papading-ya-cricket