Mofokeng le Pirates ba qala moo ba qetetseng ka dintlha

Sehlopha se mafofotha ho leba mekwallong sa Orlando Pirates, se qadile moo se qetetseng teng ka ho hlaba dintlha.

Pirates, e hlotse Golden Arrows ka 5 – 0 papadi e bapalletseng lebaleng la Orlando bosiu ba labodi.

Sehlopha se hlabile dintlha tse hlano lekgetlo la bobedi ka tatellano ka mora ho hlola TS Galaxy ka tse tsheletseng (6 – 0) pele ho kgefutso ya FIFA.

Dintlha tsa Pirates, dikene ka Relebohile Mofokeng ya hlabileng tse pedi, Oswin Appollis tse pedi le e le nngwe e keneng ka Edward Maova ya itlhabileng ka lerumo.

Mofokeng o bonahala a tsohile molota ka mora dipapadi tsa AFCON le ka mora ho hapa kgau ya sebapadi sa kgwedi makgetlo a mabedi a latellanang.

Pirates ke sehlopha sa pele sa ho hlaba dintlha tse tharo karolong ya pele ya papadi dipapading tse pedi ka tatellano mme ke sona sehlopha se hlabileng dintlha tse ngata ka ho fitisisa sehleng sena le ha se dutse boemong ba bobedi (45 goals).

Dipapading tse pedi, Pirates e hlabile dintlha tse 11 mme base hlajwe ntlha. Ho tsona ka bobedi, Mofokeng o hlabile dintlha tse 5 mme a hapa kgau ya sebapadi sa letsatsi makgetlo a mabedi.

Ka dipapadi tse 7 tse setseng, Mofokeng o lebelong la mohlabadintlha wa selemo ka dintlha tse 9 mme o boemong ba boraro ka mora Junior Dion (12 goals) le Iqraam Rayners (11 goals).

Pirates e tla thulana le dihlopha tse pedi tsa KwaZulu-Natal [Richards Bay le AmaZulu] pele ho papadi e kgolo ya Soweto Derby.

BALA HAPE: Bokamoso ba dibapadi le bakwetlisi bo qoleng ya kobo ho Chiefs