Sundowns e thatafaletsa Pirates bophelo ka ho hlola Chippa
Batshireletsi ba sekola sa Betway Premiership ba entse seo ba tummeng ka sona le ho nka ketapele ya tafoleng ya dihlopha.
Mamelodi Sundowns, e hlotse Chippa United ka 4 – 1 papading e bapalletseng lebaleng la Loftus Versfeld bosiu ba labohlano.
Sundowns, e kene papading ena ka diphetoho ka lebaka la dibapadi tse tswang sehlopheng sa naha.
Zuko Mdunyelwa, Tsiki Ntsabeleng le Keanu Cupido, ba fumane monyetla wa ho qala le papadi ha Khuliso Mudau, Teboho Mokoena ba qadile bankeng.
Dintlha tsa Sundowns dikene dikarolong tse pedi tsa papadi moo tse pedi dikeng karolong ya pele.
Marcelo Allende, Iqraam Rayners ba hlabetse Sundowns dintlha pele Sinixolo Kwayiba a hlabela United ntlha ya phumula keledi.
Karolong ya bobedi Sundowns e kgutlile e fetohile ho qetela mosebetsi mme metsotsong ya ho qetela ya papadi Tashreeq Matthews le Leon Muniz, ba hlabile dintlha ho atolosa le ho qeta papadi (4 – 1).
Tlholo ena, e fa Sundowns ketapele ya dintlha tse pedi ka hodima Orlando Pirates e dutseng boemonng ba bobedi.
Ka bobedi dihlopha dilekana ka dipapadi [22 games] mme ho setse dipapadi tse 8 pele sehla se fihla pheletsong.
BALA HAPE: Andile Jali: Mofokeng o sale monyane ho bapiswa le Zwane
