TS Galaxy e ntsha Mamelodi Sundowns mejo ka hanong

Sehlopha se balehang selepe sa TS Galaxy, se bontshitse batshireletsi ba sekola sa Betway Premiership Mamelodi Sundowns tosa le madinyane bosiung ba labobedi lebaleng la Mbombela.

Galaxy, e hlotse Sundowns ka 3 – 2 papading e neng e tuka malakabe lehlakoreng la dintlha le hoba hlokolosi sehlopheng sa Sundowns.

Dintlha tsa Galaxy, dikene ka Victor Letsoalo e le thaho ya mokoko, Sedwyn George karolong ya pele le Mpho Mvelase karolong ya bobedi.

Dintlha tsa Sundowns, dikene ka Brayan Leon ka bobedi le ha ntlha ya bobedi e bile thaho ya mokoko.

Veluyeke Zulu e bile yena sebapadi sa letsatsi ka mora lwana kgakgaulane ho etsa bonnete ba hore Sundowns hae fumane le ho sebedisa menyetla ya bona ha bonolo.

BALA: Junior Khanye o bapisa sehla sa Ben Youssef, Kaze le Nabi

Sundowns, e ne e hloka dintlha tse tharo ho dula e le monyetleng wa ho hapa lebelo leo ba le mathang le sehlopha se setseng ka dipapadi tse pedi sa Orlando Pirates mme tahlehelo ena e fa Pirates monyetla o moholo wa ho hapa sehla.

Ka lehlakoreng le leng tlholo ena e ntsha Galaxy dihlopheng tse dutseng bobeng ba ho rengwa ke selepe le ha sehlopha se setse ka papadi e le nngwe pele sehla se fihla pheletsong.

Galaxy e bapetse dipapadi tse 13 ho Betway e sa hape mme tlholo ya bona e fihlisa lenyora la bona la dintlha tse tharo pheletsong jwalo ka ha bafa Sundowns tlholo ya bona ya bobedi sehleng sena.

BALA: Orbit e tswelapele ho batlana le lebala la papadi e kwalang sehla